क्रिकेट मा पईसा बरस रहा.. हाकी केर खिलाड़ी टेंशन माः राजू 

हमार मति मारी गयी रही कि उई दिन हम गजोधर के साथ टीवी पे यूएस ओपन टेनिस देख लिहा..। ई टेनिस खेल मा एतनी शांति रही जईसे कौनो मय्यत होय गयी होय.. तो उई दिन टेनिस खेला मा कौनो नोवाक रहे ऊ जीते रहें..। उनका 28 करोड़ का चेक मिला.. हमरी तो आंखें बाहर आय गयी.. 28 करोड़ !!.. लेकिन गुरु नोवाक चेक लिहिस अउर चेक को तुड़मुड़ा के मुट्ठी में पकडे ट्राफी की तरफ देखत रहा.. हम कहा अरे यार सब जीरो वीरो तो चेक कर लेव.. बराबर हैं की नहीं..। लेकिन ऊ ट्राफी लैके ओका चूमत रहा..। ओकी मुट्ठी में जैसे जैसे मुड़त जाए.. वैसे वैसे हमरी जान उलझन मा रही.. देखो भैया हमरे दद्दा कहत रहें.. कि चेक मिलै तो तुरंतै कैश करौ.. अउर कैश मिले तो तुरंतै चेक करौ..। जो खिलाड़ी हारा रहा ओका 17 करोड़ मिला.. गजोधर कहे यार ई खेल बढ़िया हैं एकी भर्ती कहां होत है..। अपनी सानिया मिर्जा भी तो ऐसेहे 25-25, 30-30 करोड़ जीत लेत रहीं.. मगर हम लोगन के कौनो काम नहीं आवा.. काहे से ओका कमाया पैसा देश में नहीं आवा.. सब पैसा पहुंचा गवा पाकिस्तान.. दहेज मा !!
 

एक हैं हमरे दोस्त हाकी टीम के एक्स प्लेयर संजय बाजपेई.. जबसे उई ई यूएस ओपन मैच देखे हैं.. तबहीं से घर के बाहर बइठे बीड़ी पी पी के गरिया रहे हैं.. अउर भगवान् से प्रार्थना कर रहे हैं कि अगले जनम मोहे टेनिस प्लेयर ही कीजो.. अबहिन कुछ टाइम पहिले हम और संकठा ग्रीनपार्क मा हाकी मईच देखे गए रहेन.. इंडिया और बांग्लादेश का मैच होत रहा.. ओमा हमरी टीम केर एक खिलाड़ी हाकी से गेंदा लै के भागत रहा अउर सोचत रहा कि भगवान् आज का मैच जीत जाई तो पक्का मकान बनवाय लई.. बहिन केर शादी खातिर ओका दहेज का सामान भी जुटाय का है.. बप्पा की एक आंख का मोतियाबिंद केर आपरेशन भी करवाय का है.. पता चला ऊ लब्भड़ ई सब टेंशन मा अपने ही गोल मा गोल कर दिहिस.. फिर भी नसीब अच्छा रहा की ऊई दिन इंडिया मैच जीत गवा.. काहे से बांग्लादेश टीम केर खिलाड़ी हमसे जादा टेंशन मा रहें.. उई लोग तीन बार अपने ही गोल मा गोल दाग दिहिन रहे..।
 

अउर जब हमरी विजेता हाकी टीम का 10 लाख का चेक मिला.. तो ऊ कैप्टन खुशी के मारे चेक का आंखें फाड़ देखत रहा.. अब हमरी सारी समस्या दूर हुई जहिये.. तबहि न बाकी खिलाड़ी आय गये कि भैया अकेले तुम्हरा नहीं है..। हम कहा हिसाब किताब बाद में कर लिहेव पहले ट्राफी तो उठाओ.. अरे ट्राफी का कौनो देख ही नहीं रहा..। पता चला 10 लाख मा 11 प्लेयर का हिस्सा लगिहे..। तबहिन ग्राउंड के बाहर बैठे एक्स्ट्रा प्लेयर भी आवाज लगाय लगे.. हमहूं लोग भी हैं.. पता चला इनाम केर पैसा अब 16 जगह बंटिहे..। कैप्टन का मुंह एकदम छोटा हुई गवा.. ट्राफी हुवां घास मा पड़ी रही..।
 

पर ऊ कप्तान हिसाब लगावत रहा कि सबका बांटे मा हमरे हाथ मा 40 हजार अहियैं अउर ओमा भी GST कटिहै.. ई सब सोचत सोचत ऊ एतना इमोशनल हुई गवा कि ओकी आंखन से आंसू टपके लागे.. ओमा से दुई तीन बूंद आंसू चेक पे गिरे तो दस्तखत धुल गवा.. हम कहा लेव अब तुमका दूसर चेक पावे खातिर एड़ी चोटी का जोर लगावे का पड़िहै..। ई चेक पे दस्तखत करे वाला दुबारा पकड़ मा ना अहिये.. मान लेव ऊ मिलौ गवा तो ऊ पहिचाने से इनकार कर देहे.. ई सब सुन के ऊ अउर जोर जोर से रोवे लगा..
खेल मंत्रालय हॉकी पे भी ध्यान देव !!
लास्ट मा एक्के बात कहे चाहित है.. कि हमरी बात ध्यान से सुना करौ..
काहे से हमरे घर में हमरी कोई सुनत नहीं है ..- - राजू श्रीवास्तव